Ungmennaþing í Breiðholti 6.apríl

Ungmennaráð Breiðholts hefur seinustu mánuði unnið hörðum höndum að því að skipuleggja málþing fyrir ungmenni í 8.-10. bekk fyrir grunnskóla í Reykjavík. Málþingið verður haldið föstudaginn næstkomandi, 6. apríl, í íþróttahúsinu Austurbergi kl. 11-14. Á málþinginu verður fjallað um muninn á heilbrigðum og óheilbrigðum samböndum, kynferðislega áreitni og óheilbrigð samskipti á netinu. Allt eru þetta mikilvæg málefni sem snerta ungmenni í daglegu lífi og því þykir okkur mikilvægt að þau taki þátt í umræðum um þau. Allir þurfa að vera meðvitaðir um hvar mörkin liggja, hvað teljist til samþykkis, hvert hægt sé að leita og svo mætti lengi telja. Á málþinginu verða þrír fyrirlestrar og umræðuhópar eftir hvern fyrirlestur. Fyrst mun Steinunn, fulltrúi frá Stígamótum, fjalla um óheilbrigð sambönd. Dagbjört Ásbjörnsdóttir mun síðan fjalla um kynferðislega áreitni. Að lokum ræða Kári og Andrea um samskipti á netinu undir yfirskriftinni Fokk me – Fokk you . Þessi umræða er gríðarleg þörf sem þarf að vekja athygli á og ekki úr vegi að fjalla um í framhaldi af byltingunum #metoo og #sjúkást á samfélagsmiðlum. Það er ekki á hverjum degi sem fulltrúar frá mörgum skólum í Reykvík hittast og taka mikilvægar umræður á sameiginlegum vettvangi.