Hvatningarverðlaun skóla og frístundaráðs 2023

Í dag hlutu þær Þuríður Marín og Eva úr félagsmiðstöðinni Hellinum hvatningarverðlaun skóla- og frístundaráðs 2023 fyrir framúrskarandi frístundastarf.

Í félagsmiðstöðinni Hellinum hefur í vetur verið lögð áhersla á að valdefla börn og unglinga í frístundastarfinu. Það er gert með því að tryggja að þau séu virkir þátttakendur í markmiðasetningu þegar unnið er að einstaklingsáætlunum barnanna. Hellirinn leggur þannig áherslu á að börnin hafi áhrif á hvernig frítíma þeirra er háttað, í hvaða aðstæðum þau þurfa eða vilja aðstoð og hvaða markmið þau vilja setja sér í starfinu. Dómnefndin mat þetta vinnulag til mikillar fyrirmyndar og fagnar því að börn með fatlanir fái í meira mæli að hafa áhrif á hvernig frítíma þeirra er háttað.